L-EDPB isolvi t-tilwima ma’ TikTok dwar l-ipproċessar ta’ data tat-tfal

Brussell, it-3 ta’ Awwissu — L-EDPB adotta deċiżjoni għas-soluzzjoni tat-tilwim abbażi tal-Artikolu 65 tal-GDPR dwar abbozz ta’ deċiżjoni tal-Awtorità Irlandiża għall-Protezzjoni tad-Data (DPA, Data Protection Authority) fil-konfront ta’ TikTok Technology Limited (TTL). Id-deċiżjoni vinkolanti tindirizza kwistjonijiet legali li jirriżultaw minn oġġezzjonijiet għall-abbozz ta’ deċiżjoni tad-DPA Irlandiża bħala l-awtorità superviżorja ewlenija (lead supervisory authority, LSA) fir-rigward ta’ TTL. Id-Deċiżjoni vinkolanti tal-EDPB tiżgura li d-DPAs nazzjonali japplikaw il-GDPR b’mod konsistenti u korrett.

Id-DPA Irlandiża ħarġet l-abbozz ta’ deċiżjoni wara inkjesta fuq inizjattiva proprja dwar l-ipproċessar ta’ data personali tal-utenti rreġistrati ta’ TikTok bejn l-etajiet ta’ 13 u 17-il sena min-naħa ta’ TTL, kif ukoll ċerti kwistjonijiet rigward l-ipproċessar ta’ data personali ta’ tfal taħt l-età ta’ 13-il sena min-naħa ta’ TTL. Peress li ma ntlaħaq l-ebda kunsens dwar l-oġġezzjonijiet ippreżentati mid-DPAs, l-EDPB intalab isolvi t-tilwima bejn id-DPAs fi żmien xahrejn.

L-oġġezzjonijiet kienu jikkonċernaw, b’mod partikolari, jekk kienx hemm ksur tal-protezzjoni tad-data, kemm ippjanat kif ukoll prestabbilit, fir-rigward tal-verifika tal-età, u jekk kienx hemm ksur tal-prinċipju tal-ekwità fir-rigward ta’ ċerti prattiki ta’ disinn. 

L-LSA għandha tadotta d-deċiżjoni finali tagħha, indirizzata lill-kontrollur, abbażi tad-deċiżjoni vinkolanti tal-EDPB li tqis il-valutazzjoni legali tal-EDPB, mhux aktar tard minn xahar wara li l-EDPB ikun innotifika d-deċiżjoni tiegħu. L-EDPB se jippubblika d-deċiżjoni tiegħu fuq is-sit web tiegħu wara li l-LSA tkun innotifikat id-deċiżjoni nazzjonali tagħha lill-kontrollur u, jekk applikabbli, tkun saret kwalunkwe redazzjoni meħtieġa għad-Deċiżjoni Vinkolanti tal-EDPB.

Nota lill-edituri:

Għal aktar informazzjoni dwar il-proċedura tal-Artikolu 65, jekk jogħġbok ikkonsulta l-FAQ