Brussell, il-15 ta’ Settembru - Wara d-deċiżjoni vinkolanti dwar is-soluzzjoni tat-tilwim tal-EDPB tat-28 ta’ Lulju, l-Awtorità Irlandiża għall-Protezzjoni tad-Data (DPA) adottat id-deċiżjoni tagħha dwar Instagram (Meta Platforms Ireland Limited (Meta IE)) u ħarġet multa rekord tal-GDPR ta’ EUR 405 miljun.
Id-deċiżjoni finali tal-LSA ssegwi inkjesta volontarja dwar l-iżvelar pubbliku minn Instagram tal-indirizzi tal-posta elettronika u/jew tan-numri tat-telefown tat-tfal li jużaw il-karatteristika tal-kont kummerċjali tal-Instagram u ssettjar pubbliku prestabbilit għall-kontijiet personali tal-Instagram tat-tfal, matul il-perjodu li jaqa’ fl-ambitu temporali tal-investigazzjoni. Prattika li minn dak iż-żmien intemmet b’konsegwenza tal-inkjesta tal-LSA. Il-President tal-EDPB Andrea Jelinek qalet: “Din hija deċiżjoni storika. Mhux biss minħabba l-ammont tal-multa - din hija t-tieni l-ogħla multa mid-dħul fis-seħħ tal-GDPR - hija wkoll l-ewwel deċiżjoni għall-UE kollha dwar id-drittijiet tal-protezzjoni tad-data tat-tfal. B’din id-deċiżjoni vinkolanti, l-EDPB jagħmilha ċar daqs il-kristal li l-kumpaniji li jimmiraw lejn it-tfal iridu joqogħdu ħafna aktar attenti. It-tfal jistħoqqilhom protezzjoni speċifika fir-rigward tad-data personali tagħhom.”
Id-deċiżjoni vinkolanti tal-EDPB ġiet adottata abbażi tal-Artikolu 65 tal-GDPR, wara li d-DPA Irlandiża bħala l-awtorità superviżorja ewlenija (LSA) kienet bdiet il-proċedura għas-soluzzjoni tat-tilwim dwar l-oġġezzjonijiet imqajma minn diversi awtoritajiet superviżorji kkonċernati (CSAs). Fost l-oħrajn, is-CSAs oġġezzjonaw dwar il-bażi legali għall-ipproċessar u d-determinazzjoni tal-multa. Sussegwentement, id-DPC emenda l-abbozz ta’ deċiżjoni tiegħu wara l-proċess tas-soluzzjoni tat-tilwim.
Din hija l-ewwel deċiżjoni vinkolanti tal-EDPB li tindirizza wieħed mill-pilastri fundamentali tal-liġi tal-UE dwar il-protezzjoni tad-data: il-legalità tal-ipproċessar f’konformità mal-Artikolu 6 tal-GDPR. B’mod partikolari, l-EDPB ipprovda kjarifika ulterjuri dwar l-applikabbiltà tal-bażijiet legali tal-“eżekuzzjoni tal-kuntratt” u l-“interess leġittimu”.
Meta IE bbażat ruħha fuq dawn iż-żewġ bażijiet legali minflok biex ippubblikat l-indirizzi tal-posta elettronika u/jew tan-numri tat-telefown ta’ tfal li użaw kontijiet tan-negozju ta’ Instagram. L-EDPB sab li ma kien hemmx raġuni biex l-LSA tikkonkludi li l-ipproċessar inkwistjoni kien meħtieġ għall-eżekuzzjoni tal-kuntratt. Konsegwentement, Meta IE ma setgħetx tibbaża ruħha fuq l-Artikolu 6(1)(b) tal-GDPR bħala bażi legali għal dan l-ipproċessar.
Fir-rigward tal-interess leġittimu, bħala bażi legali alternattiva għall-ipproċessar, l-EDPB sab li l-pubblikazzjoni tal-indirizzi tal-posta elettronika u/jew tan-numri tat-telefown tat-tfal ma kinitx tissodisfa r-rekwiżiti skont l-Artikolu 6(1)(f) tal-GDPR, peress li l-ipproċessar jew ma kienx meħtieġ jew, li kieku tqies meħtieġ, ma kienx jgħaddi mit-test tal-ibbilanċjar meħtieġ meta ġie ddeterminat l-interess leġittimu.
Għalhekk, l-EDPB ikkonkluda li Meta IE pproċessat id-data personali tat-tfal illegalment mingħajr bażi legali u ta struzzjonijiet lil-LSA biex temenda l-abbozz ta’ deċiżjoni tagħha sabiex tistabbilixxi l-ksur tal-Artikolu 6(1) tal-GDPR.
Fl-aħħar nett, l-EDPB ta struzzjonijiet lil-LSA biex tivvaluta mill-ġdid il-multa amministrattiva prevista tagħha f’konformità mal-Artikolu 83(1) u l-Artikolu 83(2) tal-GDPR biex:
- timponi multa amministrattiva effettiva, proporzjonata u dissważiva għall-ksur addizzjonali, filwaqt li tqis in-natura u l-gravità tal-ksur, kif ukoll l-għadd ta’ suġġetti tad-data affettwati;
- tiżgura li l-ammonti finali tal-multi amministrattivi jkunu effettivi, proporzjonati u dissważivi.
Din id-deċiżjoni attwali hija mingħajr preġudizzju għal kwalunkwe valutazzjoni li l-EDPB jista’ jintalab jagħmel f’każijiet oħra, inkluż mal-istess partijiet.
Id-Deċiżjoni finali meħuda mid-DPA Irlandiża tinsab fir-Reġistru għad-Deċiżjonijiet meħuda mill-awtoritajiet superviżorji u l-qrati dwar kwistjonijiet ittrattati fil-mekkaniżmu ta’ konsistenza.
Għal aktar informazzjoni dwar il-proċedura tal-Artikolu 65 tal-GDPR, jekk jogħġbok ikkonsulta l-Art. 65 FAQ
Stqarrija għall-Istampa EDPB_2022_08
The news published here does not constitute official EDPB communication, nor an EDPB endorsement. This news item was originally published by the national supervisory authority and was published here at the request of the SA for information purposes. Any questions regarding this news item should be directed to the supervisory authority concerned.