Abbozz ta' deċiżjonijiet ta' adegwatezza tar-Renju Unit: L-EDPB jadotta opinjonijiet

Brussell, l-20 ta’ Ottubru - Matul l-aħħar plenarja tiegħu, l-EDPB adotta żewġ opinjonijiet dwar l-abbozzi ta’ deċiżjonijiet tal-Kummissjoni Ewropea dwar l-estensjoni tal-validità tad-deċiżjonijiet ta’ adegwatezza tar-Renju Unit skont ir-Regolament Ġenerali dwar il-Protezzjoni tad-Data (GDPR) u d-Direttiva dwar l-Infurzar tal-Liġi (LED) sa Diċembru 2031.*

L-opinjonijiet tal-EDPB, mitluba mill-Kummissjoni skont l-Artikolu 70(1)(s) tal-GDPR u l-Artikolu 51(1) (g) tal-LED, jindirizzaw l-estensjoni proposta ta’ sitt snin taż-żewġ deċiżjonijiet ta’adegwatezza tar-Renju Unit li għandhom jiskadu f’Diċembru 2025.

L-estensjoni tal-validità tad-deċiżjonijiet ta’ adegwatezza tar-Renju Unit se tippermetti lill-organizzazzjonijiet u lill-awtoritajiet kompetenti bbażati fl-Ewropa jkomplu jittrasferixxu d-data lil organizzazzjonijiet u awtoritajiet ibbażati fir-Renju Unit mingħajr ma jimplimentaw garanziji addizzjonali.**

“L-EDPBjilqa’ l-allinjament kontinwu bejn ir-Renju Unit u l-qafas tal-protezzjoni tad-data tal-Ewropa, minkejja l-bidliet reċenti fil-qafas legali tar-Renju Unit.

Nappella lill-Kummissjoni Ewropea biex tindirizza l-punti enfasizzati mill-Bord u biex tiżgura monitoraġġ effettiv ladarba d-deċiżjonijiet jiġu adottati. Dan se jżid ir-robustezza tal-adegwatezza tar-Renju Unit u jiżgura aktar ċertezza legali għall-organizzazzjonijiet u l-awtoritajiet kompetenti li jittrasferixxu data personali mill-Ewropa għar-Renju Unit.”

President tal-EDPB, Anu Talus

Dwar l-opinjoni tal-GDPR

Skont il-Bord, il-biċċa l-kbira tal-bidliet introdotti fil-qafas tal-protezzjoni tad-data tar-Renju Unit għandhom l-għan li jiċċaraw u jiffaċilitaw il-konformità mal-liġi. 

Xi aspetti tal-abbozz ta' deċiżjoni jistgħu jiġu ċċarati aktar. 

L-EDPBjistieden lill-Kummissjoni Ewropea tanalizza u timmonitorja aktar il-bidliet fl-Att tal-2023 dwar id-Dritt tal-UE Miżmum (Revoka u Riforma), magħruf ukoll bħala l-Att REUL, b’mod partikolari t-tneħħija tal-prinċipju tal-primazija tad-dritt tal-UE u t-tneħħija tal-applikazzjoni diretta tal-prinċipji tad-dritt tal-UE.

L-EDPB jinnota li s-Segretarju tal-Istat ingħata setgħat ġodda biex jintroduċi bidliet fil-qafas il-ġdid tal-protezzjoni tad-data, permezz ta’ regolamenti sekondarji li jeħtieġu inqas skrutinju Parlamentari. Dan huwa l-każ għat-trasferimenti internazzjonali, għat-teħid awtomatizzat ta’ deċiżjonijiet, u għall-governanza tal-Uffiċċju tal-Kummissarju tal-Informazzjoni (ICO). L-EDPB jistieden lill-Kummissjoni tindirizza r-riskji possibbli ta’ diverġenza billi tenfasizza, fid-deċiżjoni finali ta’ adegwatezza, l-oqsma li beħsiebhom jimmonitorjaw bir-reqqa.

L-EDPB iħeġġeġ ukoll lill-Kummissjoni telabora aktar il-valutazzjoni tagħha u timmonitorja r-regoli dwar it-trasferimenti mir-Renju Unit lejn pajjiżi terzi. It-test il-ġdid tal-adegwatezza, introdott mill-Att dwar l-Użu u l-Aċċess tad-Data 2025, jirrikjedi li l-livell ta’ protezzjoni tal-pajjiż terz ma jkunx materjalment aktar baxx minn dak ipprovdut għas-suġġetti tad-data mill-qafas tar-Renju Unit, iżda dan it-test ma jirreferix għar-riskju ta’ aċċess tal-gvern, l-eżistenza ta’ rimedju għall-individwi u l-ħtieġa ta’ awtorità superviżorja indipendenti.

Jenħtieġ ukoll li l-Kummissjoni tkompli tivvaluta u timmonitorja l-allegat użu mill-Gvern tar-Renju Unit ta’ Avviżi ta’ Kapaċità Teknika (“TCN”) li jirrikjedu li l-kumpaniji jevitaw il-kriptaġġ, peress li dan joħloq vulnerabbiltajiet sistemiċi u joħloq riskju għall-integrità u l-kunfidenzjalità tal-komunikazzjonijiet elettroniċi.

Fl-aħħar nett, l-EDPB jistieden lill-Kummissjoni tkompli tivvaluta u timmonitorja l-bidliet fl-istruttura tal-ICO u l-eżerċizzju tas-setgħat korrettivi tagħha. F’dan il-kuntest, l-EDPB jinnota b’mod pożittiv il-politika ta’ trasparenza tal-ICO u d-disponibbiltà tad-data statistika u analitika tal-attivitajiet ta’ infurzar tiegħu.

Id-deċiżjonijiet ta’ adegwatezza l-ġodda se jżidu mad-deċiżjonijiet tal-2021, li se jkomplu japplikaw għal oqsma mhux koperti fl-abbozzi ta’ deċiżjonijiet tal-2025. L-EDPB jibni fuq l-opinjonijiet tiegħu tal-2021 (14/2021 u 15/2021). B’mod partikolari, l-allinjament mill-qrib bejn il-qafas tal-GDPR u l-qafas legali tar-Renju Unit dwar id-dispożizzjonijiet ewlenin, enfasizzat fl-2021, għadu validu llum (inkluż, pereżempju, it-trasparenza, id-drittijiet tas-suġġetti tad-data, u kategoriji speċjali ta’ data).

Dwar l-opinjoni tal-LED

L-EDPB jilqa’ l-allinjament kontinwu bejn il-qafas tal-protezzjoni tad-data fl-Ewropa u fir-Renju Unit, u jħeġġeġ lill-Kummissjoni tikkomplementa l-valutazzjoni tagħha dwar aspetti relatati mal-eżenzjonijiet tas-sigurtà nazzjonali. Tali eżenzjonijiet jistgħu jirrinunzjaw il-biċċa l-kbira tal-prinċipji tal-protezzjoni tad-data u xi regoli ta’ trasferiment internazzjonali għall-awtoritajiet tal-infurzar tal-liġi,u jillimitaw ukoll is-setgħat ta’ infurzar u spezzjoni tal-ICO.

L-EDPB jistieden lill-Kummissjoni tanalizza r-regoli tar-Renju Unit dwar it-trasferimenti ta’ data personali lil pajjiżi terzi, b’mod partikolari t-test il-ġdid tal-adegwatezza, bl-istess mod bħal fl-opinjoni tal-GDPR.

Il-Bord jindika wkoll l-approċċ aktar permissiv għat-teħid ta’ deċiżjonijiet awtomatizzat u s-setgħat il-ġodda mogħtija lis-Segretarju tal-Istat f’din il-kwistjoni. Huwa jfakkar fl-importanza ta' rieżami uman sinifikanti u jħeġġeġ lill-Kummissjoni tiċċara u timmonitorja eżenzjonijiet possibbli mid-dritt tal-individwi li jiksbu intervent uman.

Fl-aħħar nett, l-EDPB jirrikonoxxi li s-sistema ta’ sorveljanza tal-aġenziji tal-infurzar tal-liġi kriminali kif ukoll il-mekkaniżmi ta’ rimedju jibqgħu fil-biċċa l-kbira l-istess, u jtenni l-ħtieġa li l-Kummissjoni timmonitorja mill-qrib l-applikazzjoni tas-setgħat korrettivi u r-rimedji għall-individwi fil-qafas tal-protezzjoni tad-data tar-Renju Unit.

Nota għall-edituri:

* Fit-22 ta’ Lulju 2025, il-Kummissjoni Ewropea ħarġet żewġ abbozzi ta’ deċiżjonijiet ta’ implimentazzjoni emendatorji dwar il-protezzjoni adegwata tad-data personali mir-Renju Unit skont l-Artikolu 45(3) tal-GDPR u l-Artikolu 36(3) tal-LED. Dawn l-abbozzi ta’ deċiżjonijiet għandhom l-għan li jestendu l-validità tad-deċiżjonijiet ta’ adegwatezza preċedenti adottati fit-28 ta’ Ġunju 2021. 
F’Mejju 2025, il-Kummissjoni adottat deċiżjoni biex testendi l-validità tad-deċiżjoni ta’ adegwatezza tar-Renju Unit għal sitt xhur oħra, minn Ġunju sa Diċembru 2025. L-EDPB adotta opinjoni dwar din l-estensjoni f’Mejju 2025.

** Deċiżjoni ta’ adegwatezza hija mekkaniżmu ewlieni fil-leġiżlazzjoni tal-UE dwar il-protezzjoni tad-data li tippermetti lill-Kummissjoni Ewropea tiddetermina jekk pajjiż terz jew organizzazzjoni internazzjonali joffrux livell adegwat ta’ protezzjoni tad-data. Il-Kummissjoni Ewropea għandha s-setgħa li tiddetermina, abbażi tal-Artikolu 45 tar-Regolament (UE) 2016/679 jekk pajjiż barra mill-UE joffrix livell adegwat ta’ protezzjoni tad-data.

L-adozzjoni ta’ deċiżjoni ta’ adegwatezza tinvolvi: proposta mill-Kummissjoni Ewropea; opinjoni tal-Bord Ewropew għall-Protezzjoni tad-Data; approvazzjoni mir-rappreżentanti tal-pajjiżi tal-UE; 4) l-adozzjoni tad-deċiżjoni mill-Kummissjoni Ewropea.