Mistoqsijiet?

Nieħdu nota tas-suġġeriment tiegħek lill-EDPB biex jikkunsidra din il-kwistjoni għal gwida futura. Tista’ tikkonsulta s-suġġetti li bħalissa huma inklużi fil-Programm ta’ Ħidma tal-EDPB fuq is-sit web tagħna: https://www.edpb.europa.eu/about-edpb/what-we-do/strategy-work-programme_mt.

L-EDPB ma jipprovdix pariri legali mfassla apposta liċ-ċittadini jew lill-organizzazzjonijiet privati/pubbliċi dwar kif għandha tiġi applikata l-liġi dwar il-protezzjoni tad-data għal każijiet speċifiċi. 

Ir-rwol ewlieni tal-EDPB huwa li joħroġ gwida u opinjonijiet ġenerali. Il-gwida u l-opinjonijiet kollha adottati jistgħu jiġu kkonsultati hawnhekk: Linji Gwida, Rakkomandazzjonijiet, l-Aħjar Prattiki u Opinjonijiet. Nirrakkomandaw ukoll li taqra l-Gwida dwar il-Protezzjoni tad-Data għan-Negozji ż-Żgħar. Din il-gwida se tgħinek tifhem il-kunċetti ewlenin tal-protezzjoni tad-data, id-drittijiet tal-individwi skont il-GDPR, ir-rekwiżiti ta’ konformità, il-miżuri ta’ sigurtà, u kif tittratta l-ksur tad-data.

Informazzjoni addizzjonali dwar ir-rwol tal-EDPB u l-applikazzjoni tal-GDPR, tista’ tinstab ukoll hawnhekk: Frequently Asked Questions.

Nistednuk ukoll tikkonsulta s-siti web tal-awtorità tal-protezzjoni tad-data f’pajjiżek. Il-links għas-siti web tal-Membri tagħna jinsabu hawnhekk: Our members.

Qed titlob lill-EDPB jinvestiga u jieħu azzjoni kontra organizzazzjoni li tqis li qed tikser il-leġiżlazzjoni tal-UE, inkluż permezz ta’ teknoloġiji speċifiċi, bħall-IA, il-media soċjali, jew is-servizzi ta’ messaġġi?

Fil-kuntest tar-regoli dwar il-protezzjoni tad-data, tista’ tressaq ilment quddiem l-awtorità tal-protezzjoni tad-data (DPA) tiegħek (jekk jogħġbok sib lista tagħhom fuq is-sit web tagħna: https://edpb.europa.eu/about-edpb/our-members). L-infurzar tar-regoli dwar il-protezzjoni tad-data huwa r-responsabbiltà tad-DPAs. Tista’ tikkuntattja lill-awtorità tal-protezzjoni tad-data fejn tgħix jew taħdem, jew fejn seħħ l-allegat ksur, pereżempju.

Alternattiva oħra hija li tmur fil-qrati nazzjonali fejn tgħix jew fejn huwa stabbilit il-kontrollur jew il-proċessur. 

Jekk il-GDPR japplika fis-sitwazzjoni tiegħek iżda m’intix ibbażat fl-Ewropa, xorta tista’ tilmenta ma’ DPA fl-Ewropa u/jew tmur il-qorti.

L-EDPB ma għandu l-ebda kompetenza biex jittratta talbiet jew ilmenti individwali speċifiċi, u lanqas biex jipprovdi servizzi ta’ konsulenza individwali. L-EDPB mhuwiex korp supranazzjonali li jista’ jinvestiga l-ilmenti.

Fl-aħħar nett, jekk tixtieq tilmenta dwar kif istituzzjoni, aġenzija jew korp tal-UE qed jużaw id-data personali tiegħek, tista’ tressaq ilment quddiem il-Kontrollur Ewropew għall-Protezzjoni tad-Data (jekk jogħġbok ara d-dettalji ta’ kuntatt fuq is-sit web tagħna: https://edpb.europa.eu/about-edpb/our-members).

Jekk jogħġbok innota li aħna ma ngħaddux il-messaġġ tiegħek lid-DPAs nazzjonali jew lill-EDPS. Għalhekk, għandek tikkuntattjahom direttament.

L-EDPB ma għandux il-kompetenza li jeżerċita sorveljanza fuq l-attivitajiet tad-DPAs fuq talba tal-individwi.

Jekk jogħġbok innota li l-kompetenza li tinħareġ gwida ġenerali ma tistax tinftiehem bħala mekkaniżmu għall-EDPB biex jeżerċita sorveljanza fuq kif id-DPAs jittrattaw il-każ individwali tiegħek. 

Jekk temmen li l-GDPR inkiser u m’intix sodisfatt bit-tweġiba tad-DPA, is-soluzzjoni li jifdal hija li tibda proċedimenti legali.

Il-Kumitat ta’ Sorveljanza tal-Koordinazzjoni (“CSC”) - li jeżisti fi ħdan l-EDPB - jikkoordina s-superviżjoni tal-ipproċessar ta’ data personali fis-Sistema ta’ Informazzjoni ta’ Schengen (“SIS”). Il-liġijiet rilevanti tal-UE huma r-Regolament (UE) 2018/1862 (b’mod partikolari l-Artikolu 71), u r-Regolament (UE) 2018/1861 (b’mod partikolari l-Artikolu 57).

Għad-data personali inkluża fis-SIS, għandek id-drittijiet ta’ aċċess, ta’ rettifika u ta’ tħassir. Dawn id-drittijiet jinkludu:

• Id-dritt li tkun taf jekk l-informazzjoni relatata miegħek hijiex ipproċessata fis-SIS;
• id-dritt ta' aċċess għal dik id-data;
• Id-dritt għal korrezzjoni ta’ data mhux preċiża jew tħassir relatat meta dik id-data tkun ġiet maħżuna illegalment; u
• Id-dritt li tieħu azzjoni mal-qrati, mal-awtorità tal-protezzjoni tad-data tiegħek u/jew mal-awtoritajiet kompetenti, kif xieraq, biex tikkoreġi jew tħassar data relatata miegħek jew biex tikseb kumpens.

Biex teżerċita d-drittijiet tiegħek, jekk jogħġbok ikkuntattja lill-awtorità nazzjonali kompetenti tiegħek, fil-pajjiż ta’ Schengen tal-għażla tiegħek. Għal aktar informazzjoni dwar l-awtoritajiet nazzjonali kompetenti u dwar l-awtorità tal-protezzjoni tad-data f’kull pajjiż ta’ Schengen, jekk jogħġbok ikkonsulta l-“Gwidagħall-eżerċizzju tad-drittijiet tas-suġġetti tad-data”, disponibbli fuq is-sit web tagħna. Hemmhekk tista’ ssib ukoll mudelli ta’ ittri biex jgħinuk fl-eżerċizzju tad-drittijiet tiegħek. 

Jekk jogħġbok innota li l-EDPB ma għandux il-kompetenza li jittratta lmenti jew talbiet individwali. Barra minn hekk, l-EDPB ma għandux aċċess għall-kontenut ta’ dawn is-sistemi ta’ informazzjoni u l-bażijiet ta’ data.

Aktar dettalji dwar kif teżerċita d-drittijiet tiegħek huma disponibbli fuq is-sit web tagħna https://www.edpb.europa.eu/our-work-tools/our-documents/csc-data-subject-rights/schengen-information-system-guide-exercising_mt.

Il-Kummissjoni Ewropea tista’ tiddeċiedi jekk pajjiż barra mill-Ewropa (jew organizzazzjoni internazzjonali) joffrix livell “adegwat” ta’ protezzjoni tad-data, li jiffaċilita l-flussi tad-data bejn l-Ewropa u dan il-pajjiż. 

L-EDPB huwa inkarigat mill-ħruġ ta’ opinjonijiet dwar l-abbozzi ta’ deċiżjonijiet ta’ adegwatezza, qabel id-deċiżjoni tal-Kummissjoni Ewropea. L-opinjonijiet mhumiex vinkolanti fuq il-Kummissjoni Ewropea iżda normalment huma utli għall-organizzazzjonijiet l-oħra li jiġu kkonsultati f’dan il-qafas, bħall-Istati Membri tal-UE.

Barra minn hekk, il-Kummissjoni Ewropea hija dik kompetenti biex timmonitorja l-iżviluppi f’pajjiżi mhux Ewropej li jistgħu jaffettwaw id-deċiżjonijiet ta’ adegwatezza. Xi deċiżjonijiet ta’ adegwatezza jipprevedu regolarità speċifika għar-rieżami tad-deċiżjoni u jistgħu jirreferu għall-possibbiltà li r-rappreżentanti tal-EDPB jieħdu sehem fil-proċess ta’ rieżami organizzat mill-Kummissjoni Ewropea.

Jekk jogħġbok innota wkoll li l-Awtoritajiet Ewropej għall-Protezzjoni tad-Data jistgħu jipproteġu lill-individwi fir-rigward tat-trasferimenti tad-data li jsiru fil-kuntest tad-deċiżjoni ta’ adegwatezza (jekk jogħġbok sib lista tagħhom fuq is-sit web tagħna: https://edpb.europa.eu/about-edpb/our-members).

Jekk temmen li deċiżjoni ta’ adegwatezza eżistenti mhijiex konformi mad-drittijiet fundamentali tiegħek tal-individwu għall-privatezza u l-protezzjoni tad-data, tista’ tibda lment lid-DPA tiegħek li tista’ tressaq dawk l-oġġezzjonijiet quddiem qorti nazzjonali li tista’ tkun meħtieġa tagħmel referenza għal deċiżjoni preliminari lill-Qorti tal-Ġustizzja (Ara l-Artikolu 58(5) tal-GDPR u s-sentenza Schrems tal-QĠUE (il-Kawża C-362/14)).

Għal aktar informazzjoni, jekk jogħġbok ara: https://commission.europa.eu/law/law-topic/data-protection/international-dimension-data-protection/adequacy-decisions_mt

Informazzjoni dwar opportunitajiet ta’ karriera tista’ tinstab fuq is-sit web tagħna: https://www.edpb.europa.eu/career-opportunities_mt

Jekk jogħġbok ikkuntattja lil edps-selections@edps.europa.eu jekk tixtieq aktar informazzjoni jew tixtieq tagħmel applikazzjoni spontanja. Jekk tixtieq tagħmel applikazzjoni, jekk jogħġbok semmi li qed tapplika għal pożizzjoni fis-Segretarjat tal-EDPB. Applikazzjoni spontanja mibgħuta direttament lill-EDPB titħassar mingħajr ma tintbagħat.