L-EDPB jilqa’ t-titjib taħt il-Qafas tal-Privatezza tad-Data bejn l-UE u l-Istati Uniti, iżda għad hemm tħassib

Brussell, 28 ta’ Frar - L-EDPB adotta l-opinjoni tiegħu dwar l-abbozz ta’ deċiżjoni ta’ adegwatezza rigward il-Qafas tal-Privatezza tad-Data bejn l-UE u l-Istati Uniti. L-EDPB jilqa’ t-titjib sostanzjali bħall-introduzzjoni ta’ rekwiżiti li jinkorporaw il-prinċipji tan-neċessità u tal-proporzjonalità għall-ġbir ta’ data tal-intelligence tal-Istati Uniti u l-mekkaniżmu l-ġdid ta’ rimedju għas-suġġetti tad-data tal-UE. Fl-istess ħin, jesprimi tħassib u jitlob kjarifiki dwar diversi punti. Dawn huma relatati, b’mod partikolari, ma’ ċerti drittijiet tas-suġġetti tad-data, it-trasferimenti ulterjuri, il-kamp ta’ applikazzjoni tal-eżenzjonijiet, il-ġbir massiv temporanju tad-data u l-funzjonament prattiku tal-mekkaniżmu ta’ rimedju. L-EDPB jilqa’ l-fatt jekk mhux biss id-dħul fis-seħħ iżda wkoll l-adozzjoni tad-deċiżjoni jkunu kundizzjonali fuq l-adozzjoni ta’ politiki u proċeduri aġġornati biex tiġi implimentata l-Ordni Eżekuttiva 14086 mill-aġenziji tal-intelligence kollha tal-Istati Uniti. L-EDPB jirrakkomanda li l-Kummissjoni tivvaluta dawn il-politiki u l-proċeduri aġġornati u tikkondividi l-valutazzjoni tagħha mal-EDPB.

Il-President tal-EDPB Andrea Jelinek qalet: “Livell għoli ta’ protezzjoni tad-data huwa essenzjali biex jiġu salvagwardjati d-drittijiet u l-libertajiet tal-individwi tal-UE. Filwaqt li nirrikonoxxu li t-titjib li sar fil-qafas legali tal-Istati Uniti huwa sinifikanti, nirrakkomandaw li jiġi indirizzat it-tħassib espress u li jiġu pprovduti l-kjarifiki mitluba biex jiġi żgurat li d-deċiżjoni ta’ adegwatezza tibqa’ valida. Għall-istess raġuni, naħsbu li wara l-ewwel rieżami tad-deċiżjoni ta’ adegwatezza, ir-rieżamijiet sussegwenti għandhom isiru mill-inqas kull tliet snin u aħna impenjati li nikkontribwixxu għalihom.”

L-Abbozz ta’ Deċiżjoni ta’ Adegwatezza, ippubblikat mill-Kummissjoni Ewropea fit-13 ta’ Diċembru 2022, huwa bbażat fuq il-Qafas tal-Privatezza tad-Data (Data Privacy Framework, DPF) bejn l-UE u l-Istati Uniti - maħsub biex jissostitwixxi t-Tarka tal-Privatezza invalidata mill-QĠUE fis-sentenza Schrems II. Il-komponent ewlieni tad-DPF huwa l-Prinċipji tal-Qafas tal-Privatezza tad-Data bejn l-UE u l-Istati Uniti, li nħarġu mid-Dipartiment għall-Kummerċ tal-Istati Uniti. Id-DPF huwa applikabbli biss għal organizzazzjonijiet tal-Istati Uniti li jkunu awtoċertifikati. L-EDPB issa adotta l-Opinjoni tiegħu dwar l-Abbozz ta’ Deċiżjoni, li jqis kemm l-aspetti kummerċjali kif ukoll l-aċċess u l-użu tad-data mill-awtoritajiet pubbliċi tal-Istati Uniti.

Rigward l-aspetti kummerċjali, l-EDPB jilqa’ għadd ta’ aġġornamenti li saru lill-Prinċipji tad-DPF. Huwa jinnota wkoll li għadd ta’ Prinċipji jibqgħu essenzjalment l-istess bħal dawk skont it-Tarka tal-Privatezza. Bħala tali, għad hemm xi tħassib, pereżempju, relatat ma’ xi eżenzjonijiet għad-dritt ta’ aċċess, in-nuqqas ta’ definizzjonijiet ewlenin, in-nuqqas ta’ ċarezza dwar l-applikazzjoni tal-Prinċipji tad-DPF għall-proċessuri, l-eżenzjoni wiesgħa għad-dritt ta’ aċċess għal informazzjoni disponibbli għall-pubbliku, u n-nuqqas ta’ regoli speċifiċi dwar it-teħid ta’ deċiżjonijiet u t-tfassil ta’ profil awtomatizzati. L-EDPB ikompli jtenni li l-livell ta’ protezzjoni ma jridx jiġi mminat minn trasferimenti ulterjuri. Għalhekk, huwa jistieden lill-Kummissjoni tiċċara li s-salvagwardji imposti mir-riċevitur inizjali fuq l-importatur fil-pajjiż terz iridu jkunu effettivi fid-dawl tal-leġiżlazzjoni ta’ pajjiż terz, qabel trasferiment ulterjuri.

Barra minn hekk, l-EDPB jitlob lill-Kummissjoni tiċċara l-kamp ta’ applikazzjoni tal-eżenzjonijiet rigward id-dmir ta’ konformità mal-Prinċipji tad-DPF u jenfasizza l-importanza ta’ sorveljanza u infurzar effettivi tad-DPF. Dawn l-aspetti se jiġu mmonitorjati mill-qrib mill-EDPB, flimkien mal-effettività tal-mezzi ta’ rimedju pprovduti lis-suġġetti tad-data tal-UE li d-data tagħhom tiġi pproċessata bi ksur tad-DPF.

Rigward l-aċċess tal-gvern għad-data ttrasferita lejn l-Istati Uniti, l-EDPB jirrikonoxxi t-titjib sinifikanti li rriżulta mill-Ordni Eżekuttiva (EO) 14086. L-EO tintroduċi l-kunċetti ta’ neċessità u ta’ proporzjonalità fir-rigward tal-ġbir ta’ data mill-intelligence tal-Istati Uniti (intelligence ta’ sinjali).

Barra minn hekk, il-mekkaniżmu l-ġdid ta’ rimedju joħloq drittijiet għall-individwi tal-UE u huwa soġġett għar-rieżami mill-Bord ta’ Sorveljanza tal-Privatezza u l-Libertajiet Ċivili (Privacy and Civil Liberties Oversight Board, PCLOB). L-EO tistabbilixxi wkoll aktar salvagwardji biex tiġi żgurata l-indipendenza tal-Qorti ta’ Rieżami tal-Protezzjoni tad-Data (Data Protection Review Court, DPRC), meta mqabbla mal-mekkaniżmu preċedenti tal-Ombudsperson, u tintroduċi setgħat aktar effettivi biex jiġi rimedjat il-ksur, inklużi salvagwardji addizzjonali għas-suġġetti tad-data.

L-EDPB jenfasizza li jinħtieġ monitoraġġ mill-qrib rigward l-applikazzjoni prattika tal-prinċipji ta’ neċessità u ta’ proporzjonalità li għadhom kif ġew introdotti. Tinħtieġ ukoll aktar ċarezza rigward il-ġbir massiv temporanju u ż-żamma u t-tixrid ulterjuri tad-data miġbura bil-massa.

L-EDPB tesprimi wkoll tħassib dwar in-nuqqas ta’ rekwiżit ta’ awtorizzazzjoni minn qabel minn awtorità indipendenti għall-ġbir ta’ data bil-massa skont l-Ordni Eżekuttiva 12333, kif ukoll in-nuqqas ta’ rieżami indipendenti sistematiku ex post minn qorti jew korp indipendenti b’mod ekwivalenti. Fir-rigward tal-awtorizzazzjoni indipendenti minn qabel tas-sorveljanza skont it-Taqsima 702 tal-FISA, l-EDPB jiddispjaċih li l-Qorti tal-FISA ma tirrieżaminax il-konformità mal-Ordni Eżekuttiva 14086 meta tiċċertifika programmi li jawtorizzaw l-immirar ta’ persuni li mhumiex ċittadini tal-Istati Uniti, minkejja li l-awtoritajiet tal-intelligence li jwettqu l-programm huma marbuta biha. Ir-rapporti tal-PCLOB dwar kif is-salvagwardji tal-EO 14086 se jiġu implimentati u kif dawn is-salvagwardji jiġu applikati meta tinġabar id-data skont it-Taqsima 702 tal-FISA u l-EO 12333 ikunu partikolarment utli. Rigward il-mekkaniżmu ta’ rimedju, l-EDPB jirrikonoxxi s-salvagwardji addizzjonali pprovduti, bħar-rwol tal-avukati speċjali u r-rieżami tal-mekkaniżmu ta’ rimedju mill-PCLOB. Fl-istess ħin, l-EDPB huwa mħasseb dwar l-applikazzjoni ġenerali tat-tweġiba standard tad-DPRC li tinnotifika lill-ilmentatur li ma ġie identifikat l-ebda ksur kopert jew li nħarġet determinazzjoni li tirrikjedi rimedju xieraq, speċjalment minħabba li din id-deċiżjoni ma tistax tiġi appellata. Għalhekk, l-EDPB jistieden lill-Kummissjoni timmonitorja mill-qrib il-funzjonament prattiku ta’ dan il-mekkaniżmu.