Brussell, is-16 ta’ Ġunju - L-EDPB adotta linji gwida dwar iċ-ċertifikazzjoni bħala għodda għat-trasferimenti. L-Artikolu 46(2)(f) tal-GDPR jintroduċi mekkaniżmi ta’ ċertifikazzjoni approvati bħala għodda ġdida għat-trasferiment ta’ data personali lejn pajjiżi terzi fin-nuqqas ta’ ftehim ta’ adegwatezza. L-għan ewlieni ta’ dawn il-linji gwida huwa li jipprovdu kjarifika ulterjuri dwar l-użu prattiku ta’ din l-għodda ta’ trasferiment.
Il-Viċi President tal-EDPB Ventsislav Karadjov qal: “Dawn il-linji gwida huma rivoluzzjonarji, peress li jipprovdu l-ewwel gwida prattika dwar iċ-ċertifikazzjoni bħala għodda għat-trasferimenti - għodda ġdida ta’ trasferiment introdotta mill-GDPR. Il-linji gwida jipprovdu gwida dwar kif din l-għodda tista’ tintuża fil-prattika u kif tista’ tgħin biex jinżamm livell għoli ta’ protezzjoni tad-data meta tiġi trasferita data personali miż-Żona Ekonomika Ewropea għal pajjiżi terzi.”
Il-linji gwida huma magħmula minn erba’ partijiet, kull waħda tiffoka fuq aspetti speċifiċi rigward iċ-ċertifikazzjoni bħala għodda għat-trasferimenti, bħall-iskop, il-kamp ta’ applikazzjoni u l-atturi differenti involuti; filwaqt li jimplimentaw gwida dwar ir-rekwiżiti ta’ akkreditazzjoni għall-korpi ta’ ċertifikazzjoni; kriterji speċifiċi ta’ ċertifikazzjoni għall-fini li tintwera l-eżistenza ta’ salvagwardji xierqa għat-trasferimenti; u l-impenji vinkolanti u infurzabbli li għandhom jiġu implimentati. Il-linji gwida jikkomplementaw il-linji gwida 1/2018 dwar iċ-ċertifikazzjoni, li jipprovdu gwida aktar ġenerali dwar iċ-ċertifikazzjoni. Il-linji gwida se jkunu soġġetti għal konsultazzjoni pubblika sal-aħħar ta’ Settembru.
L-EDPB adotta deċiżjoni dwar is-soluzzjoni tat-tilwim abbażi tal-Artikolu 65 tal-GDPR. Id-Deċiżjoni vinkolanti għandha l-għan li tindirizza n-nuqqas ta’ kunsens dwar ċerti aspetti ta’ abbozz ta’ deċiżjoni maħruġ mill-SA Franċiża bħala awtorità superviżorja ewlenija (LSA, lead supervisory authority) fir-rigward ta’ Accor SA, kumpanija speċjalizzata fis-settur tal-ospitalità li l-istabbiliment ewlieni tagħha jinsab fi Franza, u l-oġġezzjonijiet sussegwenti espressi minn waħda mill-awtoritajiet superviżorji kkonċernati (CSAs, concerned supervisory authorities).
L-LSA ħarġet l-abbozz ta’ deċiżjoni wara inkjesta bbażata fuq l-ilmenti dwar Accor SA, dwar in-nuqqas ta’ kunsiderazzjoni tad-dritt ta’ oġġezzjoni għall-wasla ta’ messaġġi ta’ kummerċjalizzazzjoni bil-posta u/jew diffikultajiet li jinqalgħu fl-eżerċitar tad-dritt ta’ aċċess. Fit-30 ta’ April 2021, l-LSA kkondividiet l-abbozz ta’ deċiżjoni tagħha mas-CSAs f’konformità mal-Artikolu 60(3) tal-GDPR. CSA waħda oġġezzjonat skont l-Artikolu 60(4) tal-GDPR dwar, fost l-oħrajn, l-ammont tal-multa.
L-SAs ma setgħux jilħqu kunsens dwar waħda mill-oġġezzjonijiet, li mbagħad ġiet riferuta mil-LSA lill-EDPB għad-determinazzjoni skont l-Artikolu 65(1)(a) tal-GDPR, u b’hekk bdiet il-proċedura ta’ soluzzjoni tat-tilwim.
L-EDPB issa adotta d-deċiżjoni vinkolanti tiegħu. Id-Deċiżjoni tindirizza l-merti tal-parti tal-oġġezzjoni li nstabet li hija “rilevanti u motivata” f’konformità mar-rekwiżiti tal-Artikolu 4(24) tal-GDPR.
Id-Deċiżjoni issa se tiġi tradotta b’mod urġenti skont l-Artikolu 11.6 tar-Regoli ta’ Proċedura tal-EDPB. Imbagħad, l-awtoritajiet superviżorji kkonċernati se jiġu nnotifikati formalment. L-LSA għandha tadotta d-deċiżjoni finali tagħha, indirizzata lill-kontrollur, abbażi tad-deċiżjoni tal-EDPB, mingħajr dewmien żejjed u mhux aktar tard minn xahar wara li l-EDPB ikun innotifika d-deċiżjoni tiegħu. L-EDPB se jippubblika d-deċiżjoni tiegħu fuq is-sit web tiegħu mingħajr dewmien żejjed wara li l-LSA tkun innotifikat id-deċiżjoni nazzjonali tagħha lill-kontrollur.
Nota lill-edituri:
Il-linji gwida huma soġġetti għall-kontrolli legali, lingwistiċi u tal-ifformattjar meħtieġa u se jkunu disponibbli fuq is-sit web tal-EDPB ladarba dawn ikunu tlestew.
Id-Deċiżjoni vinkolanti tal-Artikolu 65 se tiġi ppubblikata wara li l-LSA tkun innotifikat id-deċiżjoni finali tagħha lill-kontrollur. Għal aktar informazzjoni dwar il-proċedura tal-Artikolu 65, jekk jogħġbok ikkonsulta l-FAQs
The news published here does not constitute official EDPB communication, nor an EDPB endorsement. This news item was originally published by the national supervisory authority and was published here at the request of the SA for information purposes. Any questions regarding this news item should be directed to the supervisory authority concerned.