Brussell, 2 ta’ Settembru - Fit-28 ta’ Lulju, l-EDPB adotta deċiżjoni dwar is-soluzzjoni tat-tilwim abbażi tal-Artikolu 65 tal-GDPR. Id-deċiżjoni vinkolanti tfittex li tindirizza t-tilwim li qam b’segwitu ta’ abbozz ta’ deċiżjoni maħruġ mill-SA Irlandiża (IE) bħala l-awtorità superviżorja ewlenija (LSA) rigward WhatsApp Ireland Ltd. (WhatsApp IE) u l-oġġezzjonijiet sussegwenti espressi minn għadd ta’ awtoritajiet superviżorji kkonċernati (CSAs). F’konformità mal-GDPR, id-deċiżjoni vinkolanti tal-EDPB issa ġiet ippubblikata, b’segwitu tan-notifika tad-deċiżjoni finali tal-IE SA lill-kumpanija.
Wara l-valutazzjoni tiegħu, l-EDPB kien tal-opinjoni li l-IE SA għandha temenda l-abbozz ta’ deċiżjoni tagħha dwar il-ksur tat-trasparenza, il-kalkolu tal-multa, u l-perjodu għall-ordni biex tikkonforma.
Rigward it-trasparenza, l-abbozz ta’ deċiżjoni tal-IE SA diġà identifika ksur serju tal-Artikolu 12-13-14 tal-GDPR. L-EDPB identifika nuqqasijiet addizzjonali fl-informazzjoni pprovduta, li kellhom impatt fuq il-kapaċità tal-utenti li jifhmu l-interessi leġittimi li qed jiġu segwiti. Għaldaqstant, l-EDPB talab lill-IE SA biex tinkludi sejba ta’ ksur tal-Artikolu 13(1)(d) tal-GDPR fid-deċiżjoni tagħha.
Barra minn hekk, l-EDPB ikkjarifika li, filwaqt li mhux kull ksur tal-Artikolu 12-14 tal-GDPR neċessarjament jinvolvi ksur tal-Artikolu 5 (1) (a) tal-GDPR, f’dan il-każ partikolari, fid-dawl tal-gravità u n-natura ġenerali u l-impatt tal-ksur, kien hemm ksur tal-prinċipju tat-trasparenza minqux fl-Artikolu 5(1)(a) tal-GDPR.
Rigward il-ġbir tad-data ta’ dawk li mhumiex utenti ta’ WhatsApp IE - meta l-utenti jiddeċiedu li jużaw il-funzjonalità tal-Karatteristika ta’ Kuntatt - l-EDPB sab li f’dan il-każ, il-proċedura użata minn WhatsApp IE ma twassalx għall-anonimizzazzjoni tad-data personali miġbura.
Rigward il-multa imposta u l-kalkolu tal-multa, l-EDPB iddeċieda li l-fatturat ta’ impriża mhuwiex esklussivament rilevanti għad-determinazzjoni tal-ammont massimu tal-multa f’konformità mal-Artikolu 83(4)-(6) tal-GDPR, iżda jista’ jitqies ukoll għall-kalkolu tal-multa nnifisha, fejn xieraq, biex jiġi żgurat li l-multa tkun effettiva, proporzjonata u dissważiva f’konformità mal-Artikolu 83(1) tal-GDPR. F’dan il-każ, l-EDPB sab li l-fatturat konsolidat tal-kumpanija omm (Facebook Inc.) għandu jiġi inkluż fil-kalkolu tal-fatturat.
Barra minn hekk, l-EDPB, għall-ewwel darba, ipprovda kjarifika dwar l-interpretazzjoni tal-Artikolu 83(3) tal-GDPR. Meta ffaċċjat bi ksur multiplu għall-istess operazzjonijiet ta’ pproċessar jew dawk marbuta miegħu, il-ksur kollu jenħtieġ li jitqies meta jiġi kkalkolat l-ammont tal-multa. Dan minkejja d-dmir tal-SAs li jqisu l-proporzjonalità tal-multa u li jirrispettaw l-ammont massimu tal-multa stabbilit mill-GDPR.
L-Abbozz ta’ Deċiżjoni tal-IE SA inkluda wkoll ordni biex l-operazzjonijiet ta’ pproċessar jinġiebu f’konformità f’perjodu ta’ sitt xhur. L-EDPB sab li huwa ta’ importanza primarja li l-konformità mal-obbligi ta’ trasparenza tiġi żgurata fl-iqsar żmien possibbli. Għaldaqstant, l-IE SA ntalbet temenda l- iskadenza ta’ sitt xhur għall-konformità ma’ perjodu ta’ tliet xhur.
Din id-deċiżjoni vinkolanti kienet indirizzata lill-awtoritajiet superviżorji kkonċernati, u l-IE SA bħala l-SA ewlenija adottat id-deċiżjoni nazzjonali tagħha abbażi tad-deċiżjoni tal-EDPB. WhatsApp IE ġiet innotifikata bid-deċiżjoni nazzjonali, bid-deċiżjoni tal-EDPB annessa magħha.
Din id-deċiżjoni attwali hija mingħajr preġudizzju għal kwalunkwe valutazzjoni li l-EDPB jista’ jintalab jagħmel f’każijiet oħra, inkluż mal-istess partijiet.
Għal aktar informazzjoni dwar il-proċedura tal-Artikolu 65 tal-GDPR, jekk jogħġbok ikkonsulta l-FAQ tal-Artikolu 65