Brussell, 15 ta’ Diċembru - Matul l-aħħar plenarja tiegħu, l-EDPB adotta l-kontribut tiegħu għar-rapport tal-Kummissjoni Ewropea dwar l-applikazzjoni tal-GDPR. L-EDPB jikkunsidra li l-applikazzjoni tal-GDPR fl-ewwel 5 snin u nofs kienet ta’ suċċess. Filwaqt li hemm għadd ta’ sfidi importanti fil-futur, l-EDPB iqis li huwa prematur li f’dan l-istadju l-GDPR jiġi rivedut u jappella lill-koleġiżlaturi biex jadottaw malajr ir-Regolament il-ġdid li jistabbilixxi regoli proċedurali addizzjonali relatati mal-infurzar transfruntier tal-GDPR. Barra minn hekk, l-EDPB jenfasizza li d-DPAs u l-EDPB jeħtieġu biżżejjed riżorsi biex ikomplu jwettqu l-kompiti tagħhom.
Il-President tal-EDPB Anu Talus qalet: “Il-GDPR saħħaħ, immodernizza u armonizza l-prinċipji tal-protezzjoni tad-data fl-UE kollha. Il-gwida tal-EDPB kellha rwol ewlieni biex l-individwi u n-negozji jsiru konxji tad-drittijiet u tar-responsabbiltajiet tagħhom skont il-GDPR. Se nkomplu nappoġġaw l-implimentazzjoni tal-GDPR b’mod partikolari mill-SMEs, u b’mod aktar ġenerali se nkomplu noħolqu sensibilizzizzajoni dwar il-GDPR. Barra minn hekk, il-kooperazzjoni fost id-DPAs u l-infurzar tal-GDPR kisbu momentum. Aktar minn qatt qabel, l-EDPB huwa impenjat li jiżgura infurzar effettiv u konsistenti tal-GDPR.”
L-EDPB ikkonsolida l-pożizzjoni tiegħu bħala l-korp tal-UE inkarigat mill-iżgurar tal-applikazzjoni konsistenti tal-GDPR, bl-użu tas-sett sħiħ ta’ strumenti għad-dispożizzjoni tiegħu. Bena librerija komprensiva ta’ dokumenti ta’ gwida biex jgħin fil-promozzjoni tal-konformità fost il-kontrolluri u l-proċessuri u fl-infurzar konsistenti mid-DPAs. Barra minn hekk, ipprovda qafas għall-applikazzjoni prattika tal-għodod ta’ konformità bħall-kodiċijiet ta’ kondotta u l-mekkaniżmi ta’ ċertifikazzjoni, li ppermettielhom isiru operazzjonali b’mod konsistenti madwar l-UE. Barra minn hekk, l-EDPB kellu wkoll rwol uniku fis-soluzzjoni ta’ tilwim f’każijiet transfruntiera, u b’hekk żgura l-applikazzjoni konsistenti tal-GDPR.
Rigward l-infurzar, l-EDPB huwa konvint li kooperazzjoni effettiva u effiċjenti bejn id-DPAs twassal għal kultura komuni ta’ protezzjoni tad-data. L-għodod eżistenti fil-GDPR għandhom il-potenzjal li jilħqu dan il-għan, dment li jintużaw b’mod armonizzat biżżejjed.
L-EDPB u d-DPAs se jkomplu bl-isforzi tagħhom biex ikomplu jsaħħu l-kooperazzjoni fl-infurzar u biex jiksbu riżultati aktar effiċjenti u konsistenti fi ħdan il-qafas legali attwali.
Minħabba l-importanza tas-simplifikazzjoni tar-regoli proċedurali nazzjonali, f’Ottubru 2022 l-EDPB ippreżenta “lista ta’ xewqat” lill-Kummissjoni Ewropea, dwar aspetti proċedurali li jistgħu jiġu armonizzati fil-livell tal-UE. L-opinjoni konġunta tal-EDPB-EDPS tad-19 ta’ Settembru 2023 dwar il-Proposta għal Regolament li jistabbilixxi regoli proċedurali addizzjonali relatati mal-infurzar tal-GDPR, laqgħet il-fatt li l-proposta għandha l-għan li trawwem infurzar effettiv tar-regoli dwar il-protezzjoni tad-data u għandha l-għan li tagħti effett lil ħafna mis-suġġerimenti li jinsabu fil-“lista ta’ xewqat tal-EDPB”; għamlet ukoll għadd ta’ rakkomandazzjonijiet biex tiġi żgurata l-akbar effiċjenza possibbli ta’ dan ir-Regolament li jmiss.
Barra minn hekk, l-EDPB jappella lill-Istati Membri biex jiżguraw li d-DPAs kollha jkollhom ir-riżorsi meħtieġa biex iwettqu l-kompiti tagħhom b’mod effettiv, peress li hemm sfidi konsiderevoli ’l quddiem. L-ewwel u qabel kollox, ix-xenarju teknoloġiku li qed jevolvi kontinwament jippreżenta sfidi ġodda għall-protezzjoni tad-data kuljum. Hija kkunsidrata wkoll jew ġiet introdotta leġiżlazzjoni ġdida, li tipprovdi regoli addizzjonali biex jinħoloq spazju diġitali aktar sikur u biex jiġu stabbiliti kundizzjonijiet ekwi għan-negozji fl-ekonomija diġitali, bħad-DMA, id-DSA, id-DGA jew il-proposta għal Att dwar l-IA. Dawn il-leġiżlazzjonijiet il-ġodda jistgħu jqiegħdu responsabbiltajiet addizzjonali fuq id-DPAs jew fuq l-EDPB fir-rigward tal-infurzar u s-superviżjoni. Madankollu, hemm diskrepanza bejn dan l-ammont ta’ xogħol li qed jiżdied, u r-riżorsi disponibbli. Barra minn hekk, kemm il-kompiti tal-EDPB kif ukoll dawk tad-DPAs skont il-GDPR ikomplu b’intensità aakbar. Barra minn hekk, iż-żieda fil-kooperazzjoni tal-infurzar fost id-DPAs, li min-naħa tagħha twassal għal involviment akbar tal-EDPB, kellha impatt sinifikanti fuq l-ammont ta’ xogħol. Is-suċċess fit-twettiq ta’ dawn il-kompiti jibbaża ħafna fuq ir-riżorsi disponibbli għad-DPAs u għall-EDPB, inkluż permezz tas-Segretarjat tiegħu. Għalhekk huwa essenzjali li jiġi żgurat li s-Segretarjat tal-EDPB jiġi pprovdut bir-riżorsi meħtieġa, peress li għandu rwol ewlieni fit-tħejjija u fl-eżekuzzjoni ta’ ħafna mill-kompiti fdati lill-EDPB.
Fir-rigward tat-trasferimenti internazzjonali, l-EDPB jissottolinja l-importanza li jkomplu jiġu żviluppati deċiżjonijiet ta’ adegwatezza ma’ pajjiżi terzi u ma’ organizzazzjonijiet internazzjonali, u jistenna li l-Kummissjoni tiffinalizza l-ħidma tagħha fuq ir-rieżami tad-deċiżjonijiet ta’ adegwatezza adottati skont id-Direttiva 95/46/KE.
Barra minn hekk, l-EDPB iħeġġeġ lill-Kummissjoni tkompli tiżviluppa l-kooperazzjoni internazzjonali u jenfasizza l-importanza ta’ kooperazzjoni effettiva fl-infurzar ma’ pajjiżi terzi.
Matul il-plenarja, l-EDPB kellu wkoll diskussjoni ġenerali dwar il-mudell “pay or ok”. Ġie deċiż li se titħejja talba għal mandat għal linji gwida dwar dan is-suġġett.